ఏడు విమానాశ్రయాల్లో అంతర్జాతీయ ప్రయాణికులకు డిజియాత్ర ట్రయల్స్ ప్రారంభం

ఢిల్లీ, బెంగళూరు, హైదరాబాద్, కొచ్చిన్, ముంబై, చెన్నై, అమృత్సర్ విమానాశ్రయాల్లో ఈ ట్రయల్స్ నిర్వహిస్తున్నారు. ఎయిర్ ఇండియా, ఇండిగో సంస్థలు నడిపే ఎంపిక చేసిన అంతర్జాతీయ విమానాల్లో ప్రయాణించే అర్హత కలిగిన భారతీయ పౌరులు ఈ సదుపాయాన్ని వినియోగించుకోవచ్చు. ఈ-పాస్పోర్ట్ కలిగిన భారతీయులకే ప్రస్తుతానికి ఈ అవకాశం కల్పిస్తున్నారు.

విమానాశ్రయాల్లో అవసరమైన సాంకేతిక సదుపాయాలు అందుబాటులో ఉన్న చోట టెర్మినల్ ప్రవేశ ద్వారాలు, సెక్యూరిటీ హోల్డ్ ఏరియాలు (), బోర్డింగ్ గేట్ల వద్ద డిజియాత్రను ఉపయోగించుకోవచ్చు.

డిజియాత్రను ఎలా ఉపయోగించుకోవాలి

ఈ సదుపాయాన్ని వినియోగించుకోవాలంటే ప్రయాణికులు డిజియాత్ర మొబైల్ యాప్లో ఈ-పాస్పోర్ట్ ఆధారంగా వెరిఫై చేయగల డిజిటల్ గుర్తింపు ( )ను రూపొందించుకోవాలి. దీనికోసం ఈ-పాస్పోర్ట్లోని మెషిన్ రీడబుల్ జోన్ ()ను స్కాన్ చేయాలి. అనంతరం సదుపాయం ఉన్న స్మార్ట్ఫోన్ ద్వారా పాస్పోర్ట్లోని ఎలక్ట్రానిక్ చిప్లోని వివరాలను చదవాలి.

సెల్ఫీ తీసుకుని వ్యక్తిగత వివరాలను ధ్రువీకరించాలి. ఈ ప్రక్రియ పూర్తయిన తర్వాత డిజిటల్ గుర్తింపు ప్రయాణికుడి ఫోన్లోని డిజియాత్ర వాలెట్లో భద్రపరచబడుతుంది.

పాస్పోర్ట్, ఇమ్మిగ్రేషన్ తనిఖీలు తప్పనిసరి

డిజియాత్ర సదుపాయం ప్రస్తుతం అమల్లో ఉన్న ప్రయాణ విధానాలకు అదనంగా ఉపయోగపడుతుంది కానీ వాటికి ప్రత్యామ్నాయం కాదు. ప్రయాణికులు తమ పాస్పోర్ట్, ఇతర అవసరమైన ప్రయాణ పత్రాలను తప్పనిసరిగా వెంట తీసుకెళ్లాలి. విమానయాన సంస్థల డాక్యుమెంట్ వెరిఫికేషన్, ఇమ్మిగ్రేషన్ తనిఖీలు, ఇతర తప్పనిసరి ప్రయాణ ప్రక్రియలను కూడా పూర్తి చేయాలి.

దేశీయ విమానాశ్రయాల్లోనూ విస్తరణ

ప్రస్తుతం డిజియాత్ర ప్లాట్ఫామ్కు 2.65 కోట్లకు పైగా వినియోగదారులు ఉన్నారు. దేశంలోని 39 దేశీయ విమానాశ్రయాల్లో 11 కోట్లకు పైగా ప్రయాణాలకు ఈ సేవలు ఉపయోగపడ్డాయని పౌర విమానయాన మంత్రిత్వ శాఖ వెల్లడించింది. 2027 నాటికి మరో 25 దేశీయ విమానాశ్రయాలకు ఈ సేవలను విస్తరించాలని లక్ష్యంగా పెట్టుకున్నారు.

ఈ ట్రయల్స్ ద్వారా సేకరించే ప్రయాణికుల అభిప్రాయాలు, అనుభవాల ఆధారంగా 2027లో అంతర్జాతీయ విమాన ప్రయాణికుల కోసం డిజియాత్ర సేవలను మరింత విస్తరించే ప్రణాళిక రూపొందించనున్నారు.

దేశంలోని ఏడు ప్రధాన విమానాశ్రయాల్లో అంతర్జాతీయ ప్రయాణికుల కోసం డిజియాత్ర సేవల ట్రయల్స్ ప్రారంభమయ్యాయి. ఈ ప్రయోగాత్మక పరీక్షలు డిసెంబర్ 20 వరకు కొనసాగుతాయి. ఈ-పాస్పోర్ట్ కలిగిన భారతీయ పౌరులు ఈ సదుపాయాన్ని వినియోగించుకోవచ్చు. 2027 నాటికి ఈ సేవలను మరింత విస్తృతంగా అందుబాటులోకి తీసుకురావాలని యోచిస్తున్నారు.