జయశంకర్ భూపాలపల్లి జిల్లాలో విధి నిర్వహణలో ఉండగా డీటీవో ముత్తోజు వెంకన్న బొగ్గు లారీ ఢీకొని మృతి చెందారు. ఈ ఘటన గణపురం మండలం చెల్పురు శివారులోని ఆర్టీవో కార్యాలయం వద్ద చోటుచేసుకుంది.
విధి నిర్వహణలో భాగంగా వాహనాలను తనిఖీ చేస్తున్న డీటీవో వెంకన్నపైకి అదుపుతప్పిన బొగ్గు లారీ దూసుకురావడంతో ఆయన అక్కడికక్కడే మరణించారు. ఈ సంఘటనతో అధికారులు, సిబ్బందిలో తీవ్ర దిగ్భ్రాంతి నెలకొంది.
ప్రమాద వార్త తెలిసిన వెంటనే పోలీసులు, ఉన్నతాధికారులు సంఘటనా స్థలానికి చేరుకుని పరిస్థితిని సమీక్షించారు. మృతదేహాన్ని పోస్టుమార్టం నిమిత్తం భూపాలపల్లి ఏరియా ఆసుపత్రికి తరలించారు.
మృతుడు డీటీవో వెంకన్న తన విధులను నిబద్ధతతో నిర్వర్తించేవారని తోటి ఉద్యోగులు తెలిపారు. ఆయన మృతి పట్ల జిల్లా యంత్రాంగం సంతాపం వ్యక్తం చేసింది.
ఈ దుర్ఘటనపై పోలీసులు కేసు నమోదు చేసుకున్నారు. లారీ డ్రైవర్ను అదుపులోకి తీసుకుని, ప్రమాదానికి గల కారణాలపై దర్యాప్తు చేస్తున్నట్లు తెలిపారు.
